HEILSA, VELLÍÐAN OG ÖRYGGI

Mikilvægur áfangi náðist á árinu þegar heilbrigðis- og öryggisstjórnunarkerfið fékk vottun samkvæmt ISO 45001 staðlinum.

Við setjum heilsu, vellíðan og öryggi starfsfólks í forgang. Fræðsla, þjálfun og áhættugreiningar hjálpa okkur til að gera starfsumhverfið öruggara.

VELLÍÐAN Í LEIK OG STARFI

Heilbrigði á sál og líkama er höfð að leiðarljósi í allri starfseminni hjá fyrirtækinu. Við leggjum ríka áherslu á að stuðla að góðri heilsu starfsfólks þar sem hún er grundvöllur þess að geta tekið virkan þátt í samfélaginu.

Við starfrækjum öflugt forvarna- og fræðslustarf með það að markmiði að draga úr áhættu á sjúkdómum og slysum sem kunna að stafa af starfseminni.

Á árinu stigum við mikilvægt skref í átt að öruggara vinnuumhverfi þegar BM Vallá hlaut vottun samkvæmt alþjóðlega heilbrigðis- og öryggisstjórnunarstaðlinum ISO 45001.

MARKMIÐ OG MÆLIKVARÐAR

Til að efla öryggi og vellíðan starfsfólks eru nýttar fjölbreyttar aðferðir, svo sem öryggissamtöl, áhættugreiningar, skráning atvika og framkvæmd úrbótaverkefna.

Innri úttektir og stöðugar umbætur
Reglulegar innri úttektir eru framkvæmdar þar sem ábendingar eru teknar alvarlega og sífellt er unnið að umbótum. Upplýsingar um atvik, úrbætur og niðurstöður úttektanna eru skráðar í sérstakt atvikaskráningarkerfi.

Hvert atvik er vandlega skoðað, sérstaklega þau sem krefjast fyrstu hjálpar, læknismeðferðar eða leiða til fjarveru. Rót orsaka er greind og gripið til fyrirbyggjandi aðgerða til að koma í veg fyrir endurtekningar.

^{„Ég er gríðarlega stoltur af því að við náðum vottun samkvæmt ISO 45001 öryggisstaðlinum. Þetta er mikill áfangi sem endurspeglar allt það góða starf sem hefur verið unnið í öryggismálum. Þetta eru mikilvæg skref í að gera góðan vinnustað enn betri.“}

^{Guðmundur Liljar Pálsson, öryggisstjóri}

FYRIRMYNDAR ÖRYGGISMENNING

Samhliða innleiðingu á ISO 45001 var lögð rík áhersla á öryggissamtöl við starfsfólk, gerð áhættumata, notkun á LOTOTO-aðferðinni (einangrun búnaðar) og notkun 5S. Aðferðafræði 5S kemur úr Lean-stjórnun og felur í sér að skipuleggja vinnurými, draga úr sóun og nota sýnilegar merkingar til að tryggja gott skipulag. Virkir og skjalfestir töflufundir eru einnig nýttir til að greina þjálfunar- og fræðsluþarfir starfsfólks.

Skýrt umboð til að stöðva verk
Starfsfólk er hvatt til að meta öryggi áður en verk hefjast með stuttum áhættugreiningum. Hver og einn starfsmaður hefur skýrt umboð til að stöðva vinnu tafarlaust ef hann metur að öryggi sitt eða annarra sé ekki tryggt.

FORVARNIR OG FRÆÐSLA

Fyrirtækið starfar í samstarfi við Heilsuvernd, viðurkenndan þjónustuaðila á sviði heilsu- og vinnuverndar, sem veitir m.a. trúnaðarlæknisþjónustu, heilsuvernd, ráðgjöf, sálfræðiþjónustu og endurhæfingu. Starfsfólki býðst einnig árleg heilsufarsskoðun og bólusetning gegn inflúensu.

Viðverustefna og viðbrögð við áföllum
Markmið viðverustefnunnar er að bæta velferð, draga úr fjarvistum og tryggja skilvirkt og öruggt vinnuumhverfi. Umfang og vægi fjarvista er metið með Bradford-kvarðanum til að grípa inn í með viðeigandi stuðningi þegar þörf krefur. Auk þess hefur fyrirtækið komið á fót áfallateymi og viðbragðsáætlun til að takast á við alvarleg atvik eins og bráð veikindi eða slys, og veita starfsfólki nauðsynlegan stuðning.

Fræðsla í heilsu- og öryggismálum
Mikil áhersla er lögð á fræðslu og þjálfun í heilsu- og öryggismálum. Allir nýir starfsmenn þurfa að ljúka fjórum öryggisnámskeiðum áður en þeir hefja störf. Í fræðslukerfi fyrirtækisins er sérstakur flokkur tileinkaður heilsueflingu, sem hefur notið mikilla vinsælda. Heilsutengd verkefni eins og Lífshlaupið og Hjólað í vinnuna eru hluti af reglulegri þátttöku starfsfólks.