MANNAUÐUR

Jákvæð samskipti, sterk tengsl og gott upplýsingaflæði eru lykilatriði þegar kemur að vellíðan okkar besta fólks.

Við erum hluti af öflugri liðsheild með metnaðarfulla sýn og markmið um að láta til okkar taka við að byggja vistvænni framtíð.

MANNAUÐUR

Mikill metnaður er lagður í að skapa jákvætt vinnuumhverfi og góða vinnustaðamenningu. Við viljum að BM Vallá sé eftirsóttur vinnustaður með öfluga liðsheild, fögnum fjölbreytileikanum og tökum opnum armi á móti ólíkum bakgrunni og menningu.

Heilbrigði og vellíðan
Við leggjum áherslu á góð starfsskilyrði og sköpum tækifæri til starfsþróunar, auk þess sem öflugt fræðslustarf er í gangi. Heilbrigði og vellíðan starfsfólks eru okkur hjartans mál og við hvetjum alla til að hlúa að bæði andlegri, félagslegri og líkamlegri heilsu.

Tíu hamingjulyklar
Mannauðsstefnan sækir innblástur í aðferðir jákvæðrar sálfræði og styðst við tíu hamingjulykla sem leiðarljós að aukinni vellíðan og hamingju. Lögð er áhersla á gagnreyndar aðferðir sem miða að því að efla andlega heilsu og rækta með okkur jákvæða eiginleika.

ÖFLUGT FÓLK

BM Vallá leggur áherslu á að ábyrgð og verkferlar séu skýrir og aðgengilegir og byggir stjórnun á gagnsæi og hreinskiptni. Fyrirtækið leggur mikla áherslu á faglega sérhæfingu í starfsemi sinni, rýnir í styrkleika einstaklinga og teyma og hefur mótað stefnu varðandi atvinnuauglýsingar og ráðningar.

Mikill árangur hefur náðst síðustu fjögur ár við að laða að hæft og gott starfsfólk og viðbrögð við atvinnuauglýsingum hafa aukist mikið.

GILDIN OKKAR

FRAMSÝNI: Við erum framsýn og höfum ávallt nýsköpun, sjálfbærni og umhverfismál að leiðarljósi.

ÁREIÐANLEIKI: Við erum áreiðanleg og vitum að þekking og reynsla mótar framtíð okkar.

STYRKUR: Við byggjum á samvinnu, áræðni og metnaði.

FRÆÐSLUMÁL

Við höfum markvissa fræðslustefnu sem miðar að því að efla verðmætasköpun mannauðsins og skapa réttar aðstæður fyrir starfsfólk til að auka þekkingu og hæfni sína. Áherslur fræðslumála byggja á stefnu, framtíðarsýn og gildum fyrirtækisins, þar sem samvinna, nýsköpun og sjálfbærni eru höfð að leiðarljósi. Fræðsluáætlunin byggir á þörfum og óskum starfsfólks og stjórnenda, sem eru metnar með samtölum, rýnihópum, könnunum og öðrum greiningaraðferðum.

ÁHERSLUR Í FRÆÐSLU

Nýttar eru margvíslegar aðferðir við fræðslu, endurmenntun og þjálfun þar sem stuðst er við stuttar hnitmiðaðar fræðsluleiðir og verklega þjálfun.

Á árinu var áhersla lögð á fræðslu tengt áhættumati starfa, starfsmanna- og viðverusamtöl, erfið starfsmannamál, breytingastjórnun, meðvirkni, ráðningar, streitustjórnun, virðingu á vinnustað og uppbyggingu teyma.

SAMSTEYPAN FRÆÐIR

Allt starfsfólk fær aðgang að stafræna fræðslukerfinu Samsteypunni sem veitir aðgang að margvíslegu fræðsluefni. Gildir einu hvort fólk langi að auka færni í starfi eða til að bæta almenna þekkingu á hinum ýmsu sviðum.

Fræðsluþörf er metin út frá eðli og kröfum til starfa út frá mismunandi flokkun eins og sölu- og markaðssetning, sjálfbærni, heilsu- og öryggismál, hugbúnaðarmál o.fl.

ÍSLENSKUKENNSLA

Starfsfólk af erlendum uppruna fær stuðning og hvatningu til að efla íslenskukunnáttu sína, með námskeiðum og aðgangi að stafræna íslenskukennaranum Bara tala.

Sértækur orðaforði sem tengist daglegum störfum hefur aukið gagnsemi námsins. Þá sýndu mælingar að jákvæður orðaforði hafði marktæk áhrif á hamingju og vellíðan þess starfsfólks sem notaði hann.

STARFSÞRÓUN

BM Vallá leggur mikla áherslu á faglega starfsþróun og er meðvitað um mikilvægi þess að bjóða starfsfólki sínu tækifæri til að þróast í starfi og að veita því nauðsynlegan stuðning og tækifæri.

Auk þess er lögð mikil áhersla á að viðhalda og miðla þeirri miklu þekkingu og reynslu sem starfsfólk býr yfir sem er lykilatriði í starfsemi fyrirtækisins.

LEIÐTOGAÞJÁLFUN

Á síðasta ári voru þrjú innan okkar raða sem sóttu sérsniðna leiðtogaþjálfun fyrir 35 ára og yngri. Þau eiga það sameiginlegt að vera af erlendum uppruna.

STJÓRNENDANÁM

Einnig fóru tveir stjórnendur í námslínu sem er ætluð reynslumiklum stjórnendum þar sem lögð er áhersla á sjálfsþekkingu, inngildingu, markþjálfun og virka endurgjöf.

GIMSTEINARNIR OKKAR

Fyrirtækið er í samstarfi við Auðnast sem heldur starfslokanámskeið í þeim tilgangi að stuðla að farsælum tímamótum. Að ljúka störfum á vinnumarkaði er mikil breyting. Ef fólk fær tækifæri til að undirbúa starfslok sín af kostgæfni eru meiri líkur á því að tímamótin auki við ánægju og vellíðan í starfi sem og komandi árum.

Aðlögun og góður undirbúningur eru því grunnforsenda fyrir ánægjulegum starfslokum.

Eftir starfslok vegna aldurs er hægt að ganga í heiðursklúbb fyrirtækisins sem kallast Gimsteinn. Um er að ræða félagsskap fyrrverandi starfsmanna sem hafa látið af störfum sökum aldurs. Gimsteinn stendur fyrir ýmiss konar fræðslu og uppákomum, ásamt því að stuðla að áframhaldandi tengslum og félagsskap. Nýir Gimsteinar eru vígðir inn í hópinn á árshátíð fyrirtækisins og fá viðurkenningarskjal, þakklætisvott og blómvönd ásamt heiðursnafnbótinni Gimsteinn.

_{„ Öll viljum við verða gömul en ekki vera gömul og því hvet ég allt starfsfólk á eftirlaunum að taka þátt í þessum dásamlega Gimsteins-félagsskap. Við þurfum öll á hvert öðru að halda og það er ómetanlegt að við höldum áfram að tilheyra og vera virkir þátttakendur eftir starfslok.“}

Þórdís Unndórsdóttir, formaður Gimsteina.