KOLEFNISHLUTLEYSI

Við erum með skýrt markmið um kolefnishlutleysi í starfseminni og steypuframleiðslu árið 2030.

MARKMIÐ

Við stefnum ótrauð á núllið og ætlum að ná kolefnishlutleysi í starfsemi okkar árið 2030. Þetta er metnaðarfullt markmið og höfum við því skilgreint markmið og aðgerðaráætlun til að marka leiðina að núllinu. Núna leggjum við sérstaka áherslu á aðgerðir næstu tveggja ára sem eru eftirfarandi.

2025
Markmið ársins er að draga úr kolefnisspori steypunnar um 12% með minni sementsnotkun ásamt því að hvetja og styðja við viðskiptavini til að nýta sér vistvænni lausnir.

2026
Á næsta ári mun eiga sér stað mikil lækkun á kolefnisspori vegna kolefnisföngunar og förgunar hjá sementsbirgja okkar Heidelberg Materials Norge.

KOLEFNISHLUTLAUST SEMENT

Sementsframleiðsla á heimsvísu er um það bil 4.000 milljón tonn á ári og almennt er talið að u.þ.b. 8% af allri kolefnislosun heims séu rakin til framleiðslu sements. Heidelberg Materials, norski sementsbirgir BM Vallár, hefur á síðustu árum unnið að hönnun og byggingu á kolefnisföngunarstöð í Brevik, Noregi.

Stöðin mun geta fangað um 400 þúsund tonn af kolefni (koltvísýring, CO₂) árlega, sem samsvarar um það bil helmingi af útblæstri verksmiðjunnar.

Risastórt loftslagsmál
Sjálft föngunarferlið byggir á því að nýta varma og umframorku frá sementsframleiðslunni. Með þeirri orku sem til fellur ætti að vera hægt að fanga u.þ.b. 55 tonn af kolefni á klukkustund. Fangaða kolefnið frá Brevik verður flutt sjóleiðis til forðastöðvar í Øygarden og þaðan er það flutt með leiðslum til olíusvæðisins Aurora í Norðursjó, þar sem það verður dælt niður til varðveislu í jarðlög.

Kolefnishlutlaust sement
Í árslok verður hægt að bjóða upp á kolefnishlutlaust sement í steypu sem mun gegna lykilhlutverki í því að draga úr loftslagsáhrifum mannvirkjageirans og stórminnka kolefnisspor bygginga.