VIÐURKENNINGAR

Við erum bæði stolt og hrærð yfir merkum viðurkenningum, verðlaunum og tilnefningum sem við hlutum á árinu.

UMHVERFISFYRIRTÆKI SA

BM Vallá var valið umhverfisfyrirtæki ársins af Samtökum atvinnulífsins árið 2024.

Nýsköpun - Samstarf - Vistvænni steypa
Í umsögn dómnefndar kom fram að BM Vallá hafi sýnt mikla nýsköpun og frumkvæði í samstarfi við birgja og þjónustuaðila við þróun vistvænna lausna í mannvirkjagerð. Fyrirtækið hefur þegar sett vistvænna sement á markað og býður nú steypuna Berglindi, sem hefur allt að 45% minna kolefnisspor en hefðbundin steypa samkvæmt byggingarreglugerð.

Lækkun kolefnisspors steypu er forgangsverkefni hjá BM Vallá, en sementshluti steypunnar ber ábyrgð á um 85–90% af losun gróðurhúsalofttegunda í starfseminni. Því er lögð sérstök áhersla á að þróa steypu með vistvænna sementi og draga úr notkun þess.

KUÐUNGURINN

Umhverfis-, orku- og loftslagsráðuneytið veitti BM Vallá Kuðunginn 2024, í flokki stærri fyrirtækja, sem viðurkenningu fyrir framúrskarandi árangur á sviði umhverfismála.

Skýr skef - Vistvænni valkostir - Fræðsla
Í rökstuðningi dómnefndar kemur fram að BM Vallá hafi sýnt skýra forystu í vistvænni mannvirkjagerð, meðal annars með þróun steypunnar Berglindar, sem dregur úr kolefnisspori um allt að 45%.

Fyrirtækið hefur einnig minnkað losun CO₂ um 4.000 tonn með vistvænna sementi og stuðlar að hringrásarhugsun með nýtingu afgangsefna og þróun hringrásarhúsa.

Loks leggur BM Vallá áherslu á fræðslu og miðlun vistvænna lausna til viðskiptavina og innan greinarinnar.

STEINSTEYPUVERÐLAUNIN

Bygging Landsbankans við Reykjastræti hlaut Steinsteypuverðlaunin 2024, sem veitt eru af Steinsteypufélagi Íslands fyrir frumlega og vandaða notkun steypu í hönnun og framkvæmd.

Sjónsteypa og nákvæmni
Steypa frá BM Vallá gegndi lykilhlutverki í verkefninu og var alls notuð 13.827 m³ af steypu í húsið. Um er að ræða sjálfútleggjandi sjónsteypu sem krafðist mikillar nákvæmni, sérstaklega vegna fjölbreyttra forma og stórra glugga.

Sérstök áhersla var lögð á mynstursteypu í innri veggjum, ásamt forsteyptum stigaþrepum og gróðurkössum sem endurspegla berglög í íslenskri náttúru. Verðlaunin eru veitt öllu teyminu sem stóð að verkinu, þ.m.t. hönnuðum, verkfræðingum, verkkaupum og framkvæmdaraðilum.

TILNEFNING TIL MENNTAVERÐLAUNA

BM Vallá var eitt þriggja fyrirtækja sem hlaut tilnefningu til Menntaverðlauna atvinnulífsins 2025. Verðlaunin eru veitt því fyrirtæki sem þykir skara fram úr í fræðslu- og menntamálum. Alls bárust á fjórða tug tilnefninga í ár og valdi dómnefndin þau fyrirtæki sem teljast hafa sýnt sérstakan metnað í menntamálum.

Metnaðarfull nálgun í fræðslu
Í umsögn dómnefndar um BM Vallá kemur fram að fyrirtækið sé með afar metnaðarfulla nálgun í fræðslumálum, hafi mótað skýra fræðslustefnu sem styður við starfsþróun, eflir hæfni starfsmanna og skapar jákvætt vinnuumhverfi.

STJÓRNVÍSI TILNEFNING

Þrír stjórnendur innan samstæðunnar voru tilnefndir til Stjórnunarverðlauna Stjórnvísi 2025. Verðlaunin vekja athygli á mikilvægi faglegrar stjórnarhæfni og styðja við þróun þekkingar og færni stjórnenda á Íslandi.

Tilnefnd voru þau Helga Fjóla Sæmundsdóttir, framkvæmdastjóri mannauðssviðs, Sigríður Ósk Bjarnadóttir, framkvæmdastjóri umhverfis- og gæðasviðs, og Þorsteinn Víglundsson, forstjóri. Þau eru öll starfandi hjá Eignarhaldsfélaginu Hornsteini, móðurfélagi Björgunar, BM Vallár og Sementsverksmiðjunni.

FRAMÚRSKARANDI FYRIRTÆKI

BM Vallá var meðal Framúrskarandi fyrirtækja ársins 2024 samkvæmt lista Creditinfo, fjórða árið í röð. Til þess að ná slíkum árangri þarf að uppfylla ströng skilyrði, og þau fyrirtæki sem komast á listann eiga það sameiginlegt að byggja rekstur sinn á traustum stoðum og leggja áherslu á að efla hag allra.

Aðeins afreksfyrirtæki atvinnulífsins standast þessar kröfur, sem sýnir að þau eru betur í stakk búin til að ná árangri og standast álag, enda eingöngu um 2% fyrirtækja á Íslandi sem uppfylla þessi skilyrði.