Öryggismál og heilsa

Við störfum eftir skýrri stefnu í heilsu- og öryggismálum og teljum að það sé ein undirstaða ábyrgrar mannauðstefnu.

BM Vallá rekur öflugt forvarnar- og fræðslustarf sem byggir á reglum og kerfislegri nálgun á öllum þáttum rekstrar og stjórnunar til að koma í veg fyrir slys og sjúkdóma af völdum starfseminnar. Áhersla er lögð á greiningar á áhættu og aðgerðir til að draga úr henni við störf. Starfsfólk er hvatt til að huga vel að eigin öryggi í störfum með því að framkvæma stuttar áhættugreiningar áður en verk hefjast.Allt starfsfólk hefur skýrt umboð til að stöðva öll verk sem það telur að ekki sé nægilega öruggt hverju sinni.Ýmsir mælikvarðar og aðferðir eru notaðir til eftirlits og eftirfylgni, svo sem áhættugreiningar, atvikaskráningar, öryggissamtöl og úrbótaverkefni.Framkvæmdar eru innri úttektir, ábendingar skráðar og markvisst unnið að úrbótum. Haldið er utan um skráningar, úrbótaverkefni og aðgerðir úr innri úttektum í miðlægu atvikaskráningarkerfi.Unnið er úr þessum atvikum eftir tilefnum og öll alvarleg atvik sem krefjast fyrstu hjálpar, læknismeðferðar eða valda fjarveru eru rannsökuð, rótargreind og unnið að fyrirbyggjandi aðgerðum til að koma í veg fyrir að þau endurtaki sig.

Hvatt er til tilkynninga á öllum atvikum og þau atvikaskráð

Á árinu 2021 voru skráð:

169 næstum slys

8 slys á fólki

3 með fjarveru

5 sem þörfnuðust læknismeðferðar

28 öryggissamtöl - samtal sem stjórnandi á við starfsmann um öryggismál og skráir

62 úrbótaverkefni varðandi heilsu og öryggi

Skráð alvarleg næstum slys sem hefðu getað valdið fjarveru eða bana krefjast samskonar rannsóknar og slys, sem og fyrirbyggjandi aðgerða.

Áherslur í markmiðum fyrir 2022 eru:

Innleiðing og eftirfylgni tveggja staðla sem fjalla um öryggi gesta og verktaka annars vegar og um öruggan akstur hins vegar.

Öryggissamtöl sem sýnileg stjórnun yfirmanna, þar sem stjórnendum er sett markmið um að fara út á mörkina og ræða við starfsmenn um öryggi í störfum. Þessi samtöl eru skráð í atvikaskráningarkerfi.

Áhersla á þjálfun og móttöku nýliða. Allir nýliðar skulu ljúka grunnnámskeiði í öryggis- og heilsumálum áður en þeir hefja störf. Síðan fá þeir staðbundna þjálfun fyrir sitt starf.

Bætt öryggismenning, þar sem stjórnendur setja markmið sem eiga að stuðla að bættri öryggismenningu.

Stefnt er að því að ljúka innleiðingu á ISO45001 öryggisstjórnunarstaðlinum á árinu.